Лынтупаўскі палац

Невялікае мястэчка Лынтупы знаходзіцца ў 4 кіламетрах ад мяжы Беларусі з Літвой. Дабрацца сюды даволі цяжка, з першай спробы спякотным надвор'ем нават не даехалі)) Таму абрала час і ехала на машыне. І не пашкадавала: у Лынтупах без сумненняў ёсць на што паглядзець. Нягледзячы на значную занядбаласць палацава-паркава комплекса Бішэўскіх, гэты архітэктурны помнік здолеў захаваць сваю душу, непаўторную прыгажосць усяго ансамбля і кожнага яго асобнага элемента…

Палац у Лынтупах быў пабудаваны ў 1907 годзе ў стылі позняга італьянскага рэнесансу Юзэфам Бішэўскім па праектах вядомага архітэктара Тадэвуша Раствароўскага. Кожнае памяшканне адрознівалася сваёй унікальнай каляровай гамай і вылучалася багатым убраннем. Былі пакоі кітайскія, маўрытанскія, японскія. У палацы таксама правялі цэнтральнае ацяпленне і каналізацыю.

Вакол палаца была выкапана сажалка, таму здавалася, што будынак знаходзіцца на выспе. Упрыгажэннем служылі мармуровыя скульптуры і гранітная лесвіца. У маляўнічым парку навокал былі высаджаны мноства экзатычных раслін. Таксама ў парку быў пабудаваны амфітэатр, дзе праводзіліся музычныя вечары як для шляхцічаў, так і для сялян.

На жаль, сёння палац знаходзіцца ў жудасным стане, і якім ён быў стагоддзе назад можна толькі здагадвацца, гледзячы на старыя фотаздымкі, рэшткі упрыгожванняў на сценах і фрагменты пліткі на падлозе. У савецкі час на тэрыторыі сядзібы размяшчалася Лынтупская сярэдняя школа. У палацы змяшчаліся кабінет дырэктара, школьная бібліятэка, актавая зала, старэйшыя класы, а ў склепе — школьная сталовая. Адна з чатырох сажалак была засыпана, і на яе месцы было зроблена школьнае футбольнае поле. Першага верасня 1992-га года школа пераехала ў новы будынак, а пакінутая сядзіба з таго часу паступова прыходзіць у заняпад.
На дадзены момант будынак палаца стаіць у лясах. Гэты архітэктурны помнік быў выкуплены расійскім інвестарам, і далейшы лёс палаца пакуль не вядомы…