avatar

Stardust Circus і Inomarki в TNT
Апублікавана у Рэпартажы

22-га сакавіка ў менскім TNT Rock Club адбыўся вельмі цікавы канцэрт, у якім прымалі ўдзел глэм рокеры Stardust Circus і кавер-бэнд Inomarki. Пачатак мерапремства быў а 22.00, і кожнаму гурту даваўся час на два сэты, па 45 хвілін кожны. Часу хапіла і каб прэзентаваць сваю праграму, і каб адыграць мноства кавераў. У гэты вечар TNT Rock Club наведала шмат людзей, на танцпляцы было вельмі горача і людна. Такой разнастайнасьці аматараў рок музыкі я ўжо даўно ня бачыў, моладзь, мужыкі за 40 і нават офісны планктон. Усіх прысутных аб’яднала атмасфера клуба і захапленьне музыкай.

Першымі тым вечарам выступалі Stardust Circus, гурт выйшаў на сцэну пасьля амаль што двухмесячнага перапынку. Было прыемна, што хлопцы вельмі добра падрыхтаваліся да выступу і адыгралі два сэты роўна, драйвова і вельмі якасна. Гук у TNT Rock Club вельмі добры, і глэм рокеры выкарысталі гэта на ўсе 100%. Нетыповы склад гурта для напрамку глэм рок з двума гітарыстамі робіць саўнд вельмі насычаным і разнастайным. Калі вы яшчэ ня бачылі гэты гурт, то няхай вас не палохае іх музычны стыль: рознакаляровае адзеньне разам з начосамі засталіся ў 80-ых. Stardust Circus грае глэм рок 21-га пакалення, гэта помесь усяго таго, што мы любім з 70-ых і 80-ых, з чымсьці новым і цікавым. Ніякага прылізанага гучаньня, усё максімальна жорстка і цяжка. Грубыя гітары, выразныя і громкія барабаны разам з басам, а паверх усяго гэтага пранізлівы вакал. Гэта ўсё можна было ўбачыць і пачуць тым вечарам. Гурт адыграў усе свае трэкі, а таксама пацешыў каверамі на песьні AC/DC, Rob Zombie, Eurythmics, Sex Pistols, Guns’n’Roses, T.Rex, MC5, Aerosmith, Godsmack і Velvet Revolver. Людзі на танцпляцы адрываліся, скакалі і проста вар'яцелі.

Падчас перапынку паміж двума сэтамі Stardust Circus на сцэну падняўся ілюзіяніст з Англіі Edward Hilsum, які паказаў мноства цікавых фокусаў. Людзі вельмі цёпла прынялі хлопца, ягоныя фокусы усім прыйшліся даспадобы.

Наступны гурт Inomarki выйшаў да даволі распаленай аўдыторыі, публіка ад іх чакала ня меншага драйву, чым ад Stardust Circus. Inomarki цалкам спраўдзілі гэтае жаданьне і выдалі вельмі добры выступ. Добра сыграны гурт, прыемны гук і ўзаемадзеяньне з публікай зрабілі сваю справу, народ танчыў. Пасьля даволі цяжкога сэта папярэдняга гурта Inomarki гралі рок хіты для усіх пакаленьняў, пачынаючы з 60-ых гадоў і заканчваючы нашым часам. Тым вечарам можна было пачуць каверы на песьні The Doors, Elvis Presley, Blur, Red Hot Chili Peppers, Muse, Pink Floyd, Queen, Oasis і Adele. Сэт гурта таксама быў разбаўлены сваім матэрыялам. Выступ хлопцаў быў простым, прыемным і цікавым, кожны пачуў прынамсі адну са сваіх улюбёных песень. Людзі прынялі Inomarki вельмі цёпла, і рух на танцпляцы не спыняўся ні на хвіліну. Было вельмі прыемна бачыць людзей розных пакаленьняў, якія танчылі і скакалі разам.

Вельмі прыемны вечар з прыемнай музыкай, у прыемным месцы і з прыемнымі людзьмі.

0 каментароў

Каб пакінуць каментар