avatar

Найбольш чаканыя альбомы 2014
Апублікавана у Навіны

Прывітаньне ўсім ужо ў новым 2014-м годзе! Мы выдатна правялі 2013-ы і гатовыя штурмаваць новыя вяршыні!

Апошнім разам я разважаў пра гурты па-за гісторыяй рока, зараз ня буду вельмі песімістычным і распавяду пра самыя цікавыя на маю думку альбомы, якія маюць выйсьці ў гэтым годзе. Адразу хачу папярэдзіць, што інфармацыя пра некаторыя рэлізы будзе амаль афіцыйнай, а ў некаторых выпадках — ня будзе адрозьнівацца ад чарговай інтэрнэт-плёткі. Мабыць, гэтыя альбомы ды гурты прыйдуцца ня ўсім да душы, але ж давайце паспрабуем разабрацца, што рыхтуе нам новы год у плане рэлізаў.

Пачаць хацелася б зь нечага вялікага ды грандыёзнага, але самае цікавае лепей пакінуць на самы канец нататкі, а пачнем мы з болей-меней маладых гуртоў і паціху прычапаем да цяжкавагавікоў сусьветнага року і металу!

The Unguided — Fragile Immortality

Шведы The Unguided, у нашых палясцінах больш вядомыя па творчасьці гурта Sonic Syndicate, рыхтуюць свой ужо другі паўнафарматнік. Фанаты спадзяюцца, што альбом стане добрым працягам традыцый як першага альбома The Unguided, так і класічных прац тых самых сонікаў. Новы альбом будзе выдаваць Napalm Records у студзені/лютым гэтага году, ужо можна паглядзець першы кліп/сінгл з новай кружэлкі, а таксама вокладку. Спадзяюся, што сакавітыя рыфы разам зь цікавымі музычнымі падкладкамі можна будзе пачуць і на новым рэлізе, а пакуль глядзім новы кліп на песьню Inception.


Slash — ?

Памятаеце гэтага гітарыста з чорным цыліндрам, цыгарэтай у зубах і блюзавымі рыфамі? Гэта легендарны Slash, былы ўдзельнік культавых Guns’n’Roses. Не сумуе і выдае зусім неблагі матэрыял сольна ужо больш за 10 гадоў. Сумесная праца з франтмэнам гурта Alter BridgeMyles’ам Kennedy вылілася спачатку ў два хітовыя трэкі, а ў 2012 — і ў паўнафарматнік. Зараз спадар Кэнэдзі актыўна гастралюе ў падтрымку свайго новага альбому, а Слэш тым часам скончыў працу над матэрыялам для новага дыску і адправіў яго на праслухоўваньне Майлзу. Абодва музыкі спадзяюцца знайсьці час для запісу і плануюць выдаць новы дыск у пачатку гэтага году. Чакаем і спадзяемся, што новы запіс працягне добрыя традыцыі апошняга і будзе ўсё ў тым жа стылі жорсткага і мілагучнага hard rock’у/rock’n’roll’у.

Chrome Division — Infernal Rock Eternal

Суворыя нарвежцы з зорнага гурта Chrome Division жадаюць і далей малаціць hard’n’heavy/stoner rock і гатуюць чарговы паўнафраматны рэліз у гэтым годзе. Мы ўжо паказывалі вам новае відэа зь першага сінглу будучага альбому нарвежскіх рокераў. Shagrath так каментуе новую працу: “Цэлы год гурт намагаўся зрабіць нешта вельмі цікавае падчас працы ў студыі, і вынікам стала 13 новых песень. Гэта наш самы разнастайны і лепшы альбом на сёньняшні дзень. Мы вельмі ганарымся ім і ледзь можам чакаць, каб падзяліцца ім з вамі. Сачыце за навінамі… Судны дзень і Рок-н-рол forever!" Зусім хутка мы даведаемся, ці так яно, а пакуль можна яшчэ раз паглядзець новае відэа Chrome Division.


Adrenaline Mob — Men Of Honor

Яшчэ адзін зорны гурт, на гэты раз з ЗША, зьбіраецца выдаць другі альбом. Нават сыход знакамітага бубнача Mike Portnoy не разваліў і не зьмяніў планаў каманды. Заменай харызматычнага барадача стаў A.J Pero з гурта Twisted Sister. Ужо зараз можна паслухаць два трэкі з новай кружэлкі, а таксама паглядзець адно lyric-відэа. Судзіць яшчэ вельмі рана, але пакуль што ўсё выглядае вельмі добра, гэта ўсё тыя ж цяжкія і сярэднетэмпавыя кампазіцыі, якія вельмі добра хістаюць.


Black Label Society — Catacombs of the Black Vatican

Пра новы альбом гурта Zakk’a Wylde’a пакуль што вядома зусім мала. У сеціве толькі ёсьць сьвежы цізер і дата выхаду новага дыску, гэта адбудзецца ў красавіку. Гурт зусім нядаўна перажыў зьмену рытм-гітарыста, але тое не павінна аказаць уплыў на якасьць новай працы.


Axel Rudi Pell — Into the Storm

Яшчэ адзін знакаміты гітарыст рыхтуе новы матэрыял для нас з вамі. І гэта немец Axel Rudi Pell. Новы альбом стане ўжо 16-ым у дыскаграфіі гэтага выканаўца і выйдзе ўжо ў студзені. Зараз можна паслухаць некалькі прэв'ю новых песень, і можна сказаць, што новы дыск будзе ня горшы за былыя. Гэта той жа мілагучны heavy metal ад знакамітага майстра.


Motley Crue — ?

Гэтыя глэмеры яшчэ ў 2012-ым далі нам паслухаць сінгл Sex, але пасьля яго былі толькі бясконцыя плёткі пра развал гурта ў 2014, пра апошні альбом і тур. Апошнія разы музыкі ўсё ж такі абверглі ўсе чуткі і пацьвердзілі, што мы можам чакаць новы альбом, і ён абавязкова выйдзе.


Judas Priest — ?

Як мы паведамлялі раней, легендарныя брытанцы ўжо амаль скончылі працу над сваім 17-ым дыскам і гатовыя выдаць яго ў пачатку гэтага году. Хай спадар K.K. Downing і расчараваўся ў музыцы ды пакінуў гурт, але новая праца Priest павінна стаць як мінімум цікавай, тым больш што апошні альбом выходзіў аж у 2008-ым годзе.

Скончыць я хачу будучымі рэлізамі, якія можа выйдуць, а можа й не. Сярод гуртоў, якія плануюць выдаць новы матэрыл, прысутнічаюць Iron Maiden, Metallica, Guns’n’Roses і нават AC/DC. Музыкі ўсіх гэтых фрамацый у інтэрв’ю гаварылі пра магчымасьць выхаду новых кружэлак у гэтым ці наступным годзе. Ветэранам трэба ўжо нечым нас парадаваць, бо мы заўсёды чакаем навінаў і песень ад такіх ветэранаў болей, чым ад усіх астатніх гуртоў.

Чакайце новыя рэлізы, слухайце якасную музыку, чытайце BelMetal!
Rock’n’Roll Forever!

Сяргей Бохан (Rocker)

2 каментара

avatar
Judas Priest гэта цудоуна, алеж у наступным годзе чакаюцца ня меньш значныя, пранамсi для мяне рэлiзы:
Solstafir
In Flames
Blind Guardian
Sister
Illdisposed
дый ветэраны Massacre
дый некалькi больш маладзейшых
Autumn's Dawn

цi напрыклад ALFAHANNE


Дый спадзяюся нарэшце пачуць Ветах ды Тэслатрон
avatar
Дзякуй за Ваш асабісты сьпіс альбомаў)
Каб пакінуць каментар