Rudra - заснавальнікі Vedic metal

Апублікавана 8 лістапада 2011, 15:07 у Рэцэнзіі

Сябры, я пачынаю вас знаёміць з выбітнымі гуртамі сусветнага андэграунду. Гэты гурт з даволі экзатычнай для нас краіны — з Сінгапуру. Мабыць кагосьці здзіўлю, але ж метал ёсць і там і вельмі нядрэнны :) Гурт «Rudra» таму яркі прыклад. Болей таго, гэта заснавальнікі такога стылю як Vedic Metal.

Rudra — адны з лідэраў ўсходняй metal-сцэны. Каманда была ўтворана ў 1992 годзе ў Сінгапуры. З тых часоў яны ніколі не спынялі сваю творчую актыўнасць. Яны выраслі з дастаткова стандартнай death-metal каманды ў заснавальнікаў новага паджанру metal-музыкі — Vedic metal. На сённяшні дзень Rudra выпусцілі 5 поўнафарматнікаў, якія атрымалі прызнанне па ўсім свеце. Пяты альбом быў выпушчаны ў красавіку 2009 года.

Rudra — імя старажытнага індыйскага бога разбурэння. Назву гурт атрымаў з-за досыць агрэсіўнай музыкі і, вядома, з-за сваёй набліжанасці да ведычнай культуры.

Па сутнасці, Rudra — гэта мост паміж усходам і захадам. Іх унікальны стыль злучэння этнічных мелодый Індыі і цяжкіх рыфаў з death-black metal’а зрабіў іх піянерамі ў эксперыментаванні з выкарыстаннем народнай музыкі Індыі ў экстрэмальным металу. Менавіта гэта і прыцягнула да іх ўвагу металхэдаў з усяго андэграўнднага свету. Яшчэ адной асаблівасцю ў іх музыцы з'яўляецца даданне песнапенняў і мантр на санскрыце, што, несумненна, дадае таямнічасць і містыку ў іх творчасць. Уласна, гэта і ёсць тое, што было названа Vedic metal. Менавіта ў лірыцы Rudra адлюстроўваецца ўся глыбіня мудрасці ведычнай філасофіі.