Re1ikt прапануе паслухаць першы беларускі альбом post metal
Апублікавана
у
Навіны
На лэйбле «Вігма» пры падтрымцы БМАgroup выйшаў новы дыск беларусаў
Re1ikt пад назвай «Рэкі прабілі лёд». Гэта ўжо трэці рэліз на рахунку
гурта, але менавіта ён абяцае ўвайсці ў гісторыю беларускай музыкі.
Аляксандр Дземідзенка, лідар Re1ikt: «Рэкі Прабілі Лёд» — гэта першы
беларускамоўны рэліз у стылі post metal. У Беларусі гэты накірунак
толькі пачынае рабіцца папулярным, але ў Еуропе і ЗША такі мікс post
rock і metal на сёння з’яўялецца ледзь не самай актуальная плыняй, бо
знаходзіцца на стыку мэйнстрыма і цяжкага року. Мы пачалі граць нешта
падобнае ў пачатку 2000-х і яшчэ не ведалі, што гэтая сцэна актыўна
развіваецца. Гэта прыгожая атмасферная і драйвовая музыка, і нам
вельмі радасна, што мы зрабілі яе беларускай, дадалі нешта сваё».
Для таго каб падрыхтаваць слухачоў да новай незвычайнай музыкі, Re1ikt
прэзентавалі і выклалі ў Сеціва два кліпы на песні з новага альбома.
Лірычную «Тры Хвіліны» у духу саундтрэка да «Твін Пікс» і «Рэкі Пад
Ільдом» — экспрэсіўную, якая падахвочвае да таго, каб змяніць сваё
жыццё.
Новы Re1ikt скарыў не толькі беларусаў. Масквічам з S-Studio
спадабаўся музычны матэрыял, і яны зрабілі прэзэнтацыйны відэаролік у
стылі камп’ютэрных гульняў. Ён дае магчымасць паслухаць фрагменты
песняў з новага альбома Re1ikt, а таксама ўбачыць дызайн буклета.
Ілюстрацыі для вокладкі стварыла беларуская мастачка ў Германіі
Кацярына Філіст у старадаўняй тэхніцы манатыпія. Малюнкі спачатку
рабіліся на шкле, а потым пераносіліся на паперу.
Лідар Re1ikt Аляксандр Дземідзенка: «Дзякуючы афармленню ўдалося
падкрэсліць беларускасць нашага альбома «Рэкі Прабілі Лёд». Ён –
сучасны працяг традыцыяў, новае жыццё міфаў і фантасмагорыяў. Мы нават
запісалі сучасную версію народнай песні «Рана На Івана».
Паслухаць фрагменты з новага альбома Re1ikt і паглядзець новыя кліпы
можна на афіцыйным сайце гурта – re1ikt.com.
www.youtube.com/watch?&v=pdgLfAGq-aU
Канцэртная прэзентацыя дыска Re1ikt «Рэкі Прабілі Лёд» пройдзе 30
кастрычніка ў менскім клубе Re: Рublic.
У ёй таксама ўдзельнічаюць беларускія гурты «Рокаш» і Partyzone, чые
альбомы выйшлі сёлета, і Unia.
Пра гурт Re1ikt
Re1ikt – беларускі гурт, які выконвае эксперыментальную музыку.
У арсенале гурта 3 альбомы, 5 кліпаў, канцэртны DVD.
У 2010 годзе Re1ikt заняў 3-е месца ў намінацыі «Адкрыццё года» па
версіі партала «Тузін Гітоў», стаў лепшым калектывам фестываля
«Музыкальный Спарринг-2» у намінацыі «Альтэрнатыва» і даў больш за 50
канцэртаў.
У 2009-м Re1ikt атрымаў Гран-пры фестываля «Бардаўская восень» (Польша).
Удзельнік праектаў «Ноч Музеяў» у Нацыянальным мастацкім музеі, «Жывы
Гук Online», Graffiti Open Fest, серыі концэртаў супраць хатняга
гвалту «Больше ни звука», арганізаваных ААН.
Re1ikt выступаў на адной сцэне з гуртамі «Агата Кристи», Zdob Si Zdub,
«7раса», «Ляпис Трубецкой», «Вопли Видоплясова», «Троіца», NRM і
іншымі.
0 каментароў