avatar

Litvintroll. Гамон
Апублікавана у Навіны


Сёньняшняй раніцай у афіцыйнай суполцы гурта Litvintroll зьявілася інфармацыя, якая, мякка кажучы, патрэсла аматараў беларускага металу. Ад імя Васіля Варабейчыкава, дудара гурта, было напісана наступнае:

Ансамбль Litvintroll спыняе свае існаваньне.
«За дзесяцігодзьдзе свайго жыцьця мы прайшлі шмат дарог, адыгралі безліч канцэртаў і спаткалі сапраўдных сяброў. Гэта быў насычаны час.
Нажаль ня ўсе ўдзельнікі гурта ўсьведамляюць тую адказнасьць, якую накладае званьне музыкі, таму с гэтага моманту, гурт Litvintroll абвяшчаецца распушчаным.
Дзякуй усім! Keep on trollin'!»

Мы зьвярнуліся да музыкаў з просьбай праліць сьвятло на сумныя навіны, але пакуль пракаментаваць сітуацыю пагадзіўся толькі сам Васіль:

«Усё нашае жыцьцё складаецца з канфліктаў. Нават у спрэчках нараджаецца ісьціна. Часам канфлікты прымаюць незваротны характар, сабраўшыся як, вялізарны сьнежны камяк.
У 2008 годзе, калі было патрэбна абараніць імя Litvintroll, гурт вырашыў зарэгістраваць назву. І гэтую адказнасьць узяў на сябе я. Зараз, калі нашыя спрэчкі канчаткова ператварыліся ў сваркі, я ўзяў адказнасьць зноў і распусьціў гурт. Хтосьці падтрымаў мяне, хтосьці не. Але ў цяперашнім выглядзе Litvintroll існаваць ня можа. Час пакажа, на чыім баку была праўда».

Тым часам, у Litvintroll заяўлены як мінімум адзін канцэрт, таму чакаем разам каментароў і ад астатніх удзельнікаў гурта!

[абноўлена ў 12:50 12 красавіка 2015]

Нарэшце праз два дні зьявіўся афіцыйны каментар ад лідэра гурта Андрэя Апановіча ў выглядзе відэазвароту, дзе тлумачыцца сітуацыя і даецца адказ на пытаньне аб будучыні метал-фармацыі.

«Зашмат магчымасьцяў апынулася ў руках аднаго чалавека. Інфармацыя аб распадзе гурта зьяўляецца яго асабістым вырашэньнем. Нягледзячы на гэта, мы працягваем хадзіць на рэпетыцыі і працаваць над новым матэрыялам».



На відэа прысутнічаюць чатыры чалавекі: клавішнік Андрэй Гарчакоў, барабаншчык Генадзь Парахневіч, франтмэн Андрэй Апановіч і гітарыст Аляксей Жабуронак. Адсутнічаюць дудар Васіль Варабейчыкаў і басіст Алесь Стаціўка.

На нашае пытаньне, ці ёсьць гэта актуальным складам існага гурта, спадар Апановіч адказаў станоўча.

Сочым за навінамі.

6 каментароў

avatar
Фігова! Але чаму ніхто ня думае што далей? Бо раз шоўбіз тут зьнішчаны акупацыяй, дык далей іх усіх чакае толькі ўсё большае асэнсаваньне, што «Litvintroll» быў лепшым творчым дасягненьнем іхняга жыцьця. Як і адзіны альбом гурта «Tesaŭrus», які ўсё «паляпшае» склад калектыву, а толк застаўся толькі ў 2004-м.
avatar
Якой акупацыяй, спадар Вітаўт?
avatar
Каб ня быць самапэўным, прапаную цытату з сучаснай беларускай літаратуры, дзе ґенэрал ФСБ Далмат Пятроў вучыць у Маскве будучага аґента ўплыву для Беларусі: “Ґенэрал памаўчаў, адпіў глыток з шклянкі й працягваў: — Клясычны аґент уплыву павінен валодаць мовай, гісторыяй тэрыторыі, якую трэба падпарадкаваць. У нашым выпадку ніякай мовы, ніякай гісторыі. Іх гісторыя пачалася ў 1917-м годзе, датуль яны ня мелі гісторыі. — Ґенэрал Пятроў нешта ўспомніў, спахмурнеў і некалькі доўгіх хвілінаў разглядаў цьвёрды, валявы твар 37-гадовага палкоўніка Фарыда Іванова. — Зрэшты, нейкую ілюзію ім ствары, пакінь ґазэтку на іхняй мове. Але ўсіх здольных журналістаў перакупі ў расейскамоўныя выданьні. Нязломных бязьлітасна ламай. Галоўнае — задушыць веру ў сябе. Ня даць ім аніякага посьпеху. Калі хто нечага й дасягне — ані слова, маўчаць, абмежаваць фінансава. Ніякіх перамог! Ніякага сымбалю для аб'яднаньня! А таленавітыя й здольныя павіны назаўсёды зразумець, што могуць нечага дасягнуць, зрабіць кар'еру толькі праз Маскву, у Маскве, дзякуючы Маскве, падтрымліваючы Маскву” (гл. аповяд “Вокліч” у кнізе “Маўчы і будзь хітрым”, Мн., “Народная кніга”, 2007, было два выданьні). Дарэчы, учора гэтую цытату выдалілі на форуме “вольнай” ґазэты “Наша ніва”. Счыво бы эта? Дарэчы, пра “духоўную акупацыю краіны” пераканаўча піша й Васіль Якавенка ў эпапеі “Пакутны век”, якая нядаўна вышла ў Піцеры i з расейскім перакладам.
avatar
Оў, першая цытата з Кастуся Травеня.
avatar
Нiшто сабе акупанты, i iнструмент возяць, i кружэлкi адтуль нядрэнныя выдаюць.
Зусiм дыхнуць беларускай творчасьцi не даюць.
*фэйспалм*
avatar
Вы хоць самі зразумелі, аб чом вы? Тактыка «віртуознага неўразуменьня». Пісьменьнік К.Травень якраз і піша, дзе ёй навучаюць kamunikat.org/usie_knihi.html?pubid=17425 А добранькімі былі і заходнія «дружбаны», і "ўсходнія". Немцы школы адчынялі, БКА нават стварылі 23 лютага 1943, толькі зброю не далі (Б Край Абараняць), расейцы пары гуртам дысочкі выдалі, папярэдне стварыўшы тут чужынскія фарматы і чорныя сьпісы. Калі мае цытаты ня маюць рацыі, дык вы, як чалавек пішучы, стварыце на БТ перадачу пра лёс гурта «Litvintroll» або пра посьпехі якіх іншых. Ці завядзіце старонку belmetal.org на радыё. Украінскія ці польскія сайты цесна супрацоўнічаюць з мас-мэдыя, а ў нас?.. Мо хоць тады зразумееце, хто ў вашай хаце гаспадар.
Каб пакінуць каментар