Войска Полацкага княства
Апублікавана 25 траўня 2012, 10:31 у Беларусь

Хто б з вас не хацеў, хаця б і ўяўна, пабываць у Полацкім княстве ў эпоху вікінгаў? Каму б з вас не жадалася зь мячом ці сякерай наперавес ісьці насустрач ворагу і здабываць сабе вайсковую славу? Думаю, што мала хто адмовіўся б патрапіць у казку, а яшчэ лепей у рэтраспэктыву ўласнага сачыненьня. Найгалоўнейшую ролю ў стварэньні любой рэтраспэктывы адыгрываюць, канешне, веды па гісторыі. Вось я й прапаную гэтыя веды назапашваць і выкарыстоўваць па прызначэньні.

Толькі-толькі, вось-вось, шмат часу не прайшло, як выйшла ў сьвет кніга археоляга, кандыдата гістарычных навук Мікалая Аляксандравіча Плавінскага, на раскопкі да якога я вас запрашаў. Чытачы Белмэтал маюць выключную магчымасьць пазнаёміцца зь ёю аднымі зь першых.

Уласна, кніжка мае назву «Войска Полацкай зямлі: ад часоў Раґвалода да эпохі Ўсяслава Чарадзея». На зялёнай кіслотнай вокладцы мы бачым рэканструяваную выяву ваяра на фоне дывана гравюры з Радзівілаўскага летапісу, дзе паказана бітва на Нямізе.

Унутраны кантэнт такі, які й павінны быць: тоны дабраякасных малюнкаў і выяваў падмацаваны простым, але зьмястоўным тэкстам. Кніжка разглядае ўсе асноўныя моманты гісторыі вайсковай справы нашай першай Дзяржавы Х-ХІІ стст: агульныя тэндэнцыі жыцьця азначанага пэрыяду (тэрыторыя, насельніцтва, гісторыя), склад і колькасьць войскаў, узбраеньне й вайсковы рыштунак, фартыфікацыю й стратэгію вядзеньня баявых дзеяньняў.

Агромністы плюс яшчэ й ў тым, што выданьне невялікае: усяго толькі 48 старонак з малюначкамі. Так што прачытаць яго можа нават самы лянівы лайдак за паўгадзіны. Ёсьць адна добрая стратэгія ужываньня дадзенай кніжкі: яе трэба чытаць у грамадзкім транспарце, і з вамі пачнушь знаёміцца дзяўчаты (ці хлопцы, калі кнігу чытае дзяўчына). Кніжка дае +5 да ведаў, +4 да абаяньня і +8 да парамэтру «Ой, бабы, ён такі разумны». Чытаць лепей за усё пад музыка Equilibrium, Ensiferum ці Amon Amarth, што дае +5 да баявога настрою і жаданя ісьці ў бітву. Яшчэ яе можна чытаць услых дзецям і сваёй каханай. Ці ўсім навокал, што дае вам +20 да парамэтру «нябыдла».

Як мы бачым, па выніках атрымоўваюцца адныя плюсы. Так што, паважаныя мадам зэ месье, у кім сьпіць яшчэ ваяр, тэрмінова абуджайце яго. Толькі вайна й каханьне маюць значэньне ў гэтым сьвеце!