Замкі Беларусі - даведнік абарончага дойлідства
Апублікавана
у
Беларусь
Помнікі архітэктуры з'яўляюцца самымі яскравымі носьбітамі гісторыі. Кожны з іх мае свой лёс і ўласную біяграфію. Больш таго, беларускае абарончае дойлідства па прыгажосці і значнасці сваіх архітэктурных збудаванняў ні ў якім разе не саступае еўрапейскаму. Праблема ў тым, што нікому яно не патрэбна, акрамя невялічкай жменькі рамантычна настроеных энтузіястаў, падарожнікаў і аматараў навукі пад заступніцтвам спадарыні Кліо.Кніга «Замкі Беларусі» — гэта фундаментальная праца Міхаіла Аляксандравіча Ткачова — лепшага (на жаль у мінулым) спецыяліста па беларускай фартыфікацыі. Ён першы ў беларускай гістарыяграфіі прасачыў генезіс, эвалюцыю і этапы развіцця замкаў і абарончых сістэмаў населеных пунктаў, а таксама арганізацыю абароны беларускіх гарадоў.
Праца гэтая выйшла даволі даўно — 35 год таму (1977 г.), аднак яна не страціла сваёй каштоўнасці. Хтосьці скажа, што гістарычная навука ступіла далёка наперад за гэты час, з'явіліся новыя ўдакладняючыя даныя, багацейшым стаў археалагічны матэрыял. Ён будзе правы. Аднак, нават у выданні 1977 г. і пераапублікаванных выданнях з аўтарскімі дадаткамі 1987 і 2002 гадоў кожны чытач зможа знайсці для сябе шмат цікавай і карыстнай інфармацыі.
Па гэтай кнізе арыентуюцца экскурсаводы пры наладках экскурсій, гэтую кнігу ўключаюць у гістарыяграфічны агляд тыя, хто сам займаецца гістарычнай рэканструкцыяй ці вывучэннем беларускай фартыфікацыі і гэтай кнігай карыстаецца той, хто любіць адвечна быць у падарожжы па роднай Беларусі. Чаму б і удзельнікам БелМетал (хто не чытаў) не ўзяць яе і прачытаць. Прыводжу лагічныя довады:
1. У выданні змешчана апісанне больш за 30 прыгожых замкаў і крэпасцей.
2. Тут ёсць не проста гісторыя ўзнікнення таго ці іншага замка, але і пазначаны асноўныя гістарычныя падзеі з ім звязаныя: абарона Давыдам Гарадзенскім Навагрудка, разбурэнне гарадзенскіх умацаванняў крыжакамі Конрада Цірнберга, захоп замка ў Лідзе ў 1384 г. і інш.
3. Пра кожны помнік змешчана інфармацыя аб яго стане на сучасны момант (нават праз 35 год у гэтай краіне нічога не змянілася...)
4. Кніга напісана так, што ад яе немагчыма адарвацца. Але калі адарвешся — хочацца ўзяць, сабраць рэчы на ноч гледзячы, сесці ў цягнік і паехаць з якой-небудзь прыгожай дзяўчынай на пару лазіць па развалінах гэтых збудаванняў, а потым заняцца каханнем ))))
Не верыце? Пачытайце!!!
0 каментароў