Vistery - Sinister Prophecy (2012)
Апублікавана
у
Рэцэнзіі
Менскі гурт Vistery добра знаёмы беларускім металхэдам. Першы паўнафарматны рэліз “Procreation Of The Wicked”, які выйшаў ў 2011 годзе, атрымаў шмат станоўчых водгукаў. Бескампрамісны дэт-метал прыйшоўся да спадобы слухачам і крытыкам, нягледзячы на нейкую архаічнасьць і “олдскульнасьць”. Усё ж такі сапраўдны метал па-за модай.Vistery ня сталі вынаходзіць ровар, таму “Sinister Prophecy” вытрыманы ў тым жа стылі, што і папярэдняя работа, але на новым якасным узроўні. Асабліва гэта датычыцца якасьці запісу – ўсе заўвагі наконт першага альбома былі ўлічаны, таму ніякіх пытаньняў не ўзнікае. Ніякай “кашы” – ўсё выразна і гучна. Так трымаць!
Калі гаварыць непасрэдна пра саму музыку — на густ і колер, як гаворыцца… Праслухаўшы некалькі разоў “Sinister Prophecy”, я прыйшоў да высновы, што чагосьці не хапае. Першы паказчык – не ўзнікла жаданьня барабаніць пальцамі па сталу і нагамі па падлозе ў такт музыцы, а другі – не было “мурашак” па скуры. Можа не хапае драйву? Ну з гэтым быццам бы ўсё добра. Песьні ў асноўным сярэднятэмпавыя, з сакавітымі гітарамі і зубадрабільным басам, перыядычнымі ўключэньнямі бластбітаў ды хуткімі гітарнымі трэмала, таму “хістае” гэткі кактэйль як мае быць. Глыбокі гроўл ня горшы за дзядзьку Фішара. Склалася ўражаньне, што матэрыял нацэлены больш на жывыя выступы – пад гэту музыку добра было б рабіць “млын” і слэміцца. Дык чаго ж не хапае (можна ўспрымаць як параду)? Калі ў двух словах – гітарных сола і хуткіх рытмаў з сольнікам на слабую долю. Драйв-драйвам, а тэмп таксама адзін са складнікаў добрага дэт-металу – пра трэш-металічныя карані ня варта забываць. Мне здаецца, што гэтыя чароўныя складнікі зрабілі б музыку Vistery больш цікавай і разнастайнай.
Аматарам старога добрага дэт-металу – адназначна must hear. Калі творчасьць раньніх “Cannibal Corpse” для вас не пусты гук, а “Лікі сьмерці” ўлюбёны фільм, “Sinister Prophecy ” прыйдзецца вам даспадобы. Прыемна, што ў нашай краіне ёсьць такія прафесійныя музыкі, якія ня гоняцца за модай і застаюцца вернымі сабе, прыхільнікам, і сваёй музыцы. 8\10 за вернасьць стылю і якасьць рэлізу.
0 каментароў