Менскі гурт Re1ikt аб’явіў імя вакаліста і распавёў пра планы

Апублікавана 14 жніўня 2012, 13:46 у Навіны

Музыкі рады абвясьціць, што ў склад Re1ikt праз 10 месяцаў адсутнасьці вяртаецца Уладзімір Казлоў, зь якім былі запісаныя ўсе альбомы калектыву.

Уладзімір Казлоў аб узнаўленьні дзейнасьці ў гурце: «Вельмі важна адысьці ў бок для таго, каб правільна ацаніць тое, што адбываецца. Каб ня бачыць сітуацыю скажонай, каб самому ня быць аднабокім. Некалькі пунктаў гледжаньня даюць аб’ёмнае адлюстраваньне, мнагамернае.

Як пяецца, «лёгкія дарогі не трымаюць сьлед». Гэта так. Таму падарожжа працягваецца. Далучайцеся! Зь нецярпеньнем чакаю сустрэчы на канцэрце ў Менску 21 жніўня».

Нагадаем, што калектыў застаўся без франтмэна неўзабаве пасьля прэзентацыі альбома «Рэкі прабілі лёд» мінулай восеньню.

Нядаўна гурт Re1ikt выдаў і прэзентаваў другі канцертны DVD «Крыгаход», а таксама выступіў на буйных оўпэн-эйрах: Halfway Festival (Беласток) і «Наш Грунвальд» (Дудуткі) зь сесійным вакалістам Сяргеем Долгушавым.

Лідар Re1ikt Аляксандр Дземідзенка дзеліцца планамі калектыву: «За час адсутнасьці Уладзіміра мы не спынялі граць, запісалі альбом для сайд-праекта Re123+, падрыхтавалі выдатную інструментальную праграму і новую песьню Re1ikt, якую вы хутка пачуеце.

Мы зразумелі, што музыка – гэта наша агульнае дзіця і пакідаць яго было б роўна бацькоўскай здрадзе.

Re1ikt вяртаецца да актыўнай канцэртнай дзейнасьці. Першы сольны канцэрт у адноўленым складзе гурт адыграе 21 жніўня ў клубе «Графіці».