avatar

Інтэрв'ю з гуртом Hok-Key на 18-годдзе
Апублікавана у Інтэрв'ю


Шмат вады выцекла…

— Метал-гурт Hok-key сьвяткуе 18-гадовы юбілей, салідны ўзрост для гурта. Якія зьмены адбыліся за гэты час?

— Можна сказаць, што зьмянілася ўсё. Першапачаткова, калі мы сабралі гурт, наш стыль быў чымсьці сярэднім паміж хэві- і трэш-металам, гучала гэта як сьцёб-метал з адпаведнымі тэкстамі. Цяпер усё зусім па-іншаму. Да таго ж, тады мне было 18 гадоў, а цяпер зусім іншая лічба. З тых часоў усё зьмянілася, акрамя прэзідэнта.

— Як вы ацэньваеце такі доўгі шлях?

— Што пройдзена, то пройдзена. Я ведаю, што можна было зрабіць па-іншаму, ведаю, чаму гэта ня зроблена і ўсё ж не шкадую аб нязробленым. Было, аднак, весела. Ды і дарога яшчэ не закончана, мы зараз зноў на чарговым скрыжаваньні. Да таго часу, пакуль мы сумленна адносімся да саміх сабе і сваёй творчасьці, мы на правільным шляху.

— Нельга чакаць, што за столькі гадоў склад гурта застаўся б нязьменным. Што для вас зьмена складу: штуршок наперад, або, наадварот, перыяд вымушанага прыпынку?

— Гэта праўда. Шмат вады выцекла. Былі людзі, зь якімі расставацца проста імяніны сэрца і, наадварот, вялікі рубец і ступар. Усіх апошніх я памятаю… Але праходзіць час, прыходзяць новыя людзі, пачынаецца новая, сьвежая хваля, яна, вядома, нясе новыя надзеі. Як сёрфінг — упаў, падняўся, асядлаў хвалю.

— Куды нясе вас новая хваля?

— Наперад, вядома!



— R.I.P. — Трэці альбом гурта, меладычны, крыху змрочны, не падобны да папярэдніх. Распавядзіце трохі пра працу над альбомам, пра яго ідэю.

— Мы не прытрымліваліся ніякіх правілаў, проста рабілі тое, што здавалася нам правільным. Ідэі альбома адразу не было, проста пісалі песьні пра людзей вакол, рэлігію, філасофію, прыроду, пра… жыцьцё — і атрымалася канцэпцыя. Iнструменты запісалі даволі хутка. Вось далей пачаліся праблемы. Гэта і зьмена вакаліста, і адаптацыя песень пад яго. Зьвядзеньне, зьмена студыі, перазьвязденьне і г.д. Гэта ўсё заняло доўгіх тры гады.

— Ці задаволеныя вы водгукамі крытыкаў і прыхільнікаў на новую пласьцінку? Ці мае гэта вялікае значэньне для вас?

— Мы пішам музыку ад сэрца, гэта сумленная музыка і разумеем, што камусьці яна прыйдзецца па душы, а камусьці не, і гэта абсалютна нармальна. Вядома, мы цікавімся тым, што людзі думаюць пра нашу музыку, пішуць у сацыяльных сетках, але аддаем перавагу назіраньню іх рэакцыі на канцэртах.

— На юбілейным канцэрце ў гонар 18-годдзя Hok-key выканаў слухачам старыя песьні, прэзентаваў новы альбом і зусім новыя творы на беларускай мове з хорам. Што гэта: зьмена стылю? Даніна модзе?

— О, калі родная мова беларусаў становіцца моднай — гэта выдатна! Але гэта праўда, мы ў чарговы раз вырашылі паспрабаваць нешта для сябе новае. Запрасілі некаторых удзельнікаў Народнай харавой капэлы БДУ і паспрабавалі. Вынік нам усім спадабаўся. Вырашылі запісаць некалькі песень, але так як матэрыялу набралася шмат, гэта выльецца ў новы альбом.

— Якім ён будзе, і ці ня прыйдзецца чакаць яго яшчэ тры гады?

— Нарэшце ў Hok-key выпрацавалася правільная стратэгія запісу. Мы абсталявалі памяшканьне пад студыю, прыдбалі апаратуру, і павольна пачалі. На сёньняшні дзень мы запісалі ўсю рытм-секцыю — гэта 12 трэкаў, і важдаемся зь гітарамі. Вядзем перамовы з польскім даволі вядомым лэйблам пра зьвядзеньне і выданьне. Плануем восеньню 2013 года, па традыцыі, яго прэзентаваць 7 лістапада.

— Ці выконваеце вы кавер-версіі вядомых песень?

— Бывае, прыходзіцца. У нас ёсьць асобная праграма, якая складаецца зь песень Accept, Megadeth, Dio, Black Sabbath…

— Толькі заходніх гуртоў?

— Не, чаму ж, таксама расейска-савецкіх: Круиз, Кино, Август… Песьня «Перемен» Кино, нават трапіла ў альбом «Ad Libitum". Гэта ўсё можна знайсьці на нашым афіцыйным сайце www.hok-key.com

— Якім ты бачыш гурт Hok-key празь 5 гадоў?

— Жывым! Будзем граць на канцэртах, што-небудзь зноў запісваць, рубіць цяжмет, адным словам — Жыць! 5 гадоў гэта ня так у прынцыпе і шмат.

— Уласна, амаль пра ўсё пагаварылі, і напрыканцы пару слоў асабіста:

-Посьпехаў! Яны ўсім патрэбны!
Iнтэрв'ю: Дэ Цвяткоў
Адказваў: Яр Сапуноў

0 каментароў

Каб пакінуць каментар