avatar

Balfor: варвары з Украіны
Апублікавана у Інтэрв'ю

Апошні месяц зімы пачнецца cа сьвята для пасьпеўшых засумаваць менскіх блэкарэй. У нашу сталіцу прыбудзе зборная блэк-метал дэлегацыя — фіны Hell Spirit і Rienaus, украінцы Balfor і Raventale, а дапоўняць кампанію менчукі Infestum. Сёньня накіруем сваю ўвагу на творчы шлях Barbaric Black Metal гурта, як пазіцыянуюць стыль самі музыкі, пад назвай Balfor. Яшчэ два гады таму фаны пралівалі горкія сьлёзы ад вестак аб роспуску гурта, але нядоўга доўжыўся іх смутак. Правадыр варвараў здолеў адрадзіць банду, укамплектаваць яе знакамітымі музыкамі ўкраінскай блэк-сцэны, з абноўленым складам прыняць удзел у мностве фестываляў у сваёй краіне і за мяжой, нават засесьці ў студыі для запісу новага альбому. У перапынку паміж канцэртамі і набегамі на студыю выкраіў час для інтэрв'ю зь BelMetal заснавальнік і лідэр Balfor Антон Прымак.

У сувязі з тым, што апошнія тыдні ўвесь сьвет ахоплены навагодняй гарачкай, давай пагутарым пра мінулы год. Распавядзі, што ён прынёс гурту Balfor?

Гэта быў досыць цяжкі год, па шэрагу вядомых прычын справы рухаліся больш павольна, чым мы таго хацелі, нам давялося разьвітацца зь гітарыстам і іншае. Аднак мы не сядзелі бяз справы і ўсё ж здолелі прыняць удзел у некалькіх фестывалях, у тым ліку наведаць вашу краіну. І, самае важнае, нарэшце запісалі наш новы альбом.

Наступнае пытаньне па апошняй зьмене ў складзе. Як уліўся ў каманду новы гітарыст Aldor? Прайшло зусім мала часу ад яго далучэньня да гурта да першага выступу ў складзе Balfor.

Aldor хутка ўліўся ў гурт. Яму не спатрэбілася шмат часу, каб развучыць наш матэрыял, ужо праз два тыдні пасьля яго прыходу мы былі гатовыя да канцэртнай дзейнасьці і ён выдатна паказаў сябе на Via Sinistra Fest у Харкаве. Акрамя таго, ён пасьпеў запісаць сола для новага альбому, якія гучаць вельмі крута.

Ты заснаваў гурт у зусім юным узросьце — у 15 гадоў. Чаго хацеў дасягнуць з Balfor у далёкім 1997? Ці адчуваеш, што ўвасобіў свае ідэі ў рэальнасьць за гэты час? Як ацэньваеш творчы шлях гурта?

Так, гэта было вельмі даўно :) Цяпер мне дастаткова цяжка ўспомніць тыя мэты, якія я ставіў для сябе ў 1997 годзе, але, напэўна, гэта было жаданьне граць блэк-метал, якому я верны да цяперашніх дзён. Вельмі шмат ідэй усё яшчэ засталіся нерэалізаванымі па тых ці іншых прычынах, але я думаю, што мы абавязкова ажыцьцявім іх у будучыні. Што тычыцца творчага шляху гурта, я родам зь вельмі маленькага шахцёрскага мястэчка, у якім і зараджаўся Balfor, і я ня ведаю аніводнага музыкі, які б здолеў выехаць нават за межы вобласьці, таму так, атрымалася дасягнуць вельмі шмат, але і наперадзе яшчэ многа.

За ўсе гэтыя гады быў верны толькі Balfor або ўдалося паўдзельнічаць у іншых музычных праектах?

Да таго як я стварыў Balfor, мне давялося грать у некалькіх лакальных гуртах, пасьля гэтага я некалькі разоў прымаў удзел у якасьці сесійнага музыкі ў некалькіх украінскіх гуртах. Цяпер у мяне ёсьць сайд-праект, мы ўжо практычна завяршылі працу над матэрыялам і хутка пачынаем яго запіс.

Распавядзі падрабязней пра сайд-праект. Гэта нешта кардынальна новае па стылістычнай накіраванасьці?

Гэта новы праект, створаны ўдзельнікамі ўкраінскага блэк-метал гурта Stryvigor, я ўдзельнічаю ў гэтым праекце ў якасьці вакаліста. Мне складана цалкам ахарактарызаваць стылістыку гурта, матэрыял досыць атмасферны і эпічны, за аснову ўзяты ўсё той жа блэк-метал, аднак будзе вельмі шмат чыстага вакалу.

Памятаеш свой першы канцэрт? Ці зьмяніліся з тых часоў эмоцыі, зь якімі выходзіш на сцэну?

Вядома, памятаю. Гэта было з адным зь першых гуртоў, у якіх я граў, мы выступалі ў мясцовым ДК на разагрэве ў гурта, які прыехаў да нас у горад. Я вельмі хваляваўся і пацеў))) З таго часу безумоўна шмат чаго зьмянілася.


Многія метал-банды з Украіны гучна заявілі пра сябе, і ўкраінская метал-сцэна, безумоўна, мае найвелізарны патэнцыял. Наколькі складана камандам праявіць сябе і прыцягнуць увагу публікі?

Па маім глыбокім перакананьні, досыць лёгка прыцягнуць увагу публікі, маючы добры матэрыял. За апошні час ва Ўкраіне зьявілася нямала добрых гуртоў, якія граюць вельмі класную музыку і яны, безумоўна, не абдзеленыя ўвагай публікі.

Як правільней ахарактарызаваць узаемаадносіны паміж калегамі па метал-сцэне: падтрымка і ўзаемадапамога або канкурэнцыя?

Не магу даць адназначнага адказу, аднак я думаю, што ўсё ж больш узаемнай падтрымкі паміж гуртамі. Я вельмі ўдзячны многім людзям з украінскай сцэны, якія дапамаглі нам з запісам альбому.


Якія праблемы метал-сцэны Ўкраіны можаш пазначыць?

Праблемаў шмат, але, мабыць, асноўная — гэта тое, што гурты прадастаўлены самі сабе. Унутры краіны гурты ня маюць ніякай падтрымкі з боку лэйблаў, часопісаў і прамоўтэраў, як гэта адбываецца ў заходніх краінах. Ад гэтага сцэна разьвіваецца вельмі марудна.

Што скажаш наконт украінскай публікі? Чаму яны аддаюць перавагу — слухаць улюбёных выканаўцаў жыўцом або дома перад маніторам? Ці ёсьць праблема з наведвальнасьцю канцэртаў?

Украінская публіка вельмі крутая, у нас людзі ведаюць, навошта ідуць на канцэрт. Наведвальнасьць канцэртаў у апошні час некалькі ўпала. Але цікавыя гурты або канцэрты з канцэптуальным складам усё яшчэ нядрэнна зьбіраюць.

Купляеш дыскі каманд, якія табе падабаюцца? Ці заўсёды даступныя ў інтэрнэце mp3 цалкам выцесьнілі запісы альбомаў на фізічных носьбітах?

Зразумела, вельмі шмат слухаю і пампую ў інтэрнэце, аднак сапраўды годныя альбомы намагаюся купляць як на CD, так і пры магчымасьці на вініле.

Многія ўладальнікі калекцыі вінілаў асабліва ганарацца асобнымі экземплярамі. Ёсьць у тваёй такія жамчужыны?

Так, у мяне ёсьць некалькі сямідзюймовак, якія былі выпушчаныя вельмі лімітаваным накладам. Гэта спліт Koldbrann «Metalni Bog» (500 шт) і Eerie «Into Everlasting Death» (100 шт).

З творчасьцю якіх беларускіх музыкаў знаёмы? З многімі, верагодна, даводзілася дзяліць сцэну. Ці трапляюць трэкі беларускіх гуртоў у твой плэйліст?

Не магу пахваліцца добрымі ведамі беларускай метал-сцэны, але, безумоўна, знаёмы з творчасьцю такіх гуртоў як Gods Tower, Infestum, Znich і іншымі гуртамі «на слыху». Вельмі люблю Gods Tower, якія досыць часта гучаць у маім плэйлісьце.

Праца над наступным альбомам Balfor ідзе поўным ходам. Што слухачам чакаць ад новага рэлізу?

Так, мы ўжо практычна завяршылі запіс, засталося некалькі дробных рысак і мы прыступім да зьвядзеньня. Як я ўжо казаў раней, запіс праходзіць ня так хутка, як нам бы таго хацелася, але вынікам я задаволены на ўсе сто. Я думаю, гэты рэліз дазволіць слухачам адкрыць шмат новых граняў нашай творчасьці, безумоўна, гэта будзе ўсё той жа Balfor, аднак слухачоў чакае вельмі шмат новых творчых знаходак. Песьні сталі больш аб'ёмныя, глыбокія і злыя.

Мы пачуем сьвежы матэрыял на менскім канцэрце ў лютым?

Так, мы зьбіраемся адыграць шмат новых песень.

Дзякуй за інтэрв'ю! І традыцыйна некалькі словаў чытачам?

Дзякуй за ўвагу і вашую падтрымку. Убачымся ў Менску.


Тэкст: Вольга Вячэрская

0 каментароў

Каб пакінуць каментар